"Ons as onderwyseresse en u as ouers vorm ‘n span om saam vir ons kinders ’n goeie voorskoolse grondslag te lê en terselfdertyd hul ervaringsveld te verbreed. Daarom beklemtoon ons die feit dat ons afhanklik is van u lojale ondersteuning en samewerking. Saam as ‘n span dra ons u kleuter se belange op die hart. U as ouers moet asseblief die vrymoedigheid neem om ons te skakel of 'n afspraak by die skool te reël indien u enige vrae, probleme of ervarings rakende u kleuter met ons wil deel. Dit is ons erns om elke kleuter deeglik te leer ken en terselfdertyd gelukkige ouers te hê.

 

Ons nooi u vriendelik uit om ons skool enige tyd te kom besoek en betrokke te raak by die oueraktiwiteite van ons Preprimêre Skool. Op hierdie wyse sal ons mekaar beter leer ken en as span kan saamwerk tot voordeel van elke kleuter se onderrig en opvoeding. Baie dankie vir die vertroue wat u reeds in Wesbank Preprimêre Skool gestel het. Ons wil u verseker dat ons hierdie Godgegewe roeping na die beste van ons vermoë sal uitleef tot voordeel van elke kleuter wat Hy aan ons toevertrou het."